Depression

 DEPRESSION

Jadeed dour mein insan ko tarah tarah ke masael ka samna hai, jin ki waja se bohat se afrad depression ka shikar hojate hain. Mahereen isse jaded dour ka bohat ahem masla qarar dete hain. In ke mutabiq koi afrad agar 15  din tak pareshan rahe toh wo depression ka shikar hojata hai. Mahereen ne depression ki kae wajuhat batae hai jin mein se kuch yeh hain keh, zimedariyon ka bojh aur inhe kum karne ke liye wasael ki kami ka ehsas, kum waqt mein zayada se zayada dolat aur shohrat hasil karne ka khabt, dil ki kamzoori, har mamle mein bohat zayada ghor-o-fikar karne ki adat, koi sheh hasil karne ka junoon, aik dosre se aggey barhne ki koshish, beroozgari, mohabbat mein nakami aur achanak bohat chota ya bara ghum milna waghera.

Depression mein mubtila loog apni salahiyaton ko khul kar samne bhi nahi la pate. Is mein mubtila afrad ka mood bhi badalta rehta hai. Wo kabhi khush nazar ata hai aur kabhi naraz, isse choti khushi zayada aur chote ghum bare mehsoos hote hain. Is marz ki aik waja insan ka daba hua ghussa bhi hota hai, lehaza kaha jata hai keh depression se bachne ke liye zaroori ghusse ka izhar karna bhi zaroori hota hai. Mazi ke tajurbaat aur talkh yaadein, is marz ki shidat mein izafa karti hain. Mahereen ke baqool mard choo keh apne ghusse ya dabao ka izhar nasha ya tashadud kar ke kar lete hain, lehaza in ke muqable mein khawateen zayada depression ka shikar hoti hain.

Depression ke shikar afrad ko tanha nahi chorna chahye. Inhe khud ko kisi na kisi kaam mein masruf rakhna chahye. Depression mein mubtila afrad ke azeez-o-waqarib ko inhe yeh ehsas dilate rehna chahye keh wo dunya mein tanha nahi. Inhe halat se nimatne ke liye tadabeer ikhtiyar karne par uksana chahye aur yeh yaad dilate rehna chahye keh pahar mein bhi saring banae jasakti hai.